PARODONTIT KASALLIGINI DAVOLASHGA KOMPLEKS YONDASHUVLAR

Abstract

Parodontit – tishlarni o‘rab turuvchi va ushlab turuvchi to‘qimalarning surunkali yallig‘lanish kasalligi bo‘lib, zamonaviy stomatologiyaning eng dolzarb muammolaridan biri hisoblanadi. Jahon sog‘liqni saqlash tashkiloti ma’lumotlariga ko‘ra, katta yoshdagi aholining sezilarli qismi turli darajadagi parodontal kasalliklardan aziyat chekadi. Kasallikning rivojlanishi natijasida milk qonashi, patologik cho‘ntaklarning hosil bo‘lishi, alveolyar suyak rezorbsiyasi, tishlarning qimirlay boshlashi va oxir-oqibat ularning yo‘qotilishi kuzatiladi. Bu esa nafaqat chaynash funksiyasining buzilishiga, balki bemorlarning hayot sifati pasayishiga ham olib keladi. So‘nggi yillarda parodontitning etiologiyasi va patogenezi bo‘yicha olib borilgan ilmiy tadqiqotlar ushbu kasallik multifaktorial xarakterga ega ekanligini ko‘rsatmoqda. Kasallik rivojlanishida mikroorganizmlar bilan bir qatorda organizmning immun javobi, endokrin tizim kasalliklari, metabolik buzilishlar, zararli odatlar, noto‘g‘ri ovqatlanish va stress kabi omillar ham muhim o‘rin tutadi. Ayniqsa, qandli diabet, yurak-qon tomir kasalliklari hamda immunitet tanqisligi holatlarida parodontitning og‘ir kechishi va davolash samaradorligining pasayishi kuzatiladi.